IPARD 3 - 225 Milionë Euro për 1700 Fermerë
Do të krijohen 2558 vende të reja pune dhe 2558 vende të tjera do të ruhen në bujqësi dhe agropërpunim, e barabartë me 1.1% të fuqisë punëtore në të dy sektorët
28 Tetor 2021
Mbështetje për 1700 Fermerë dhe Agropërpunues.
Sipas revistës Monitor, një vlerësim i pavarur i cili i paraprin programit IPARD
III ka nënvizuar se autoritetet shqiptare duhet të punojnë më shumë në drejtim
të transparencës si dhe të analizimit të mundësive, risqeve, pikave të forta
dhe të dobëta.
Kompania Ecorys Croatia mori në analizë gjatë periudhës qershor-gusht
programin e Zhvillimit Rural të vendit për vitin 2021-2027, nën IPARD III, duke
dhënë edhe këshillat se ku duhet të jetë fokusi.
“Një çështje me rëndësi është transparenca. Grupet e interesuara kanë pohuar gjatë intervistave se transparenca e vendimeve në lidhje me kontraktimet, pagesat dhe refuzimet kanë qenë të jo të kënaqshme nën IPARD II dhe se priten përmirësime për periudhën e ardhshme të programit” thuhet në dokumentin e bërë publik nga Ministria e Bujqësisë dhe Zhvillimit Rural.
Në vlerësimin e përgjithshëm kompania ka nënvizuar se stili i dokumenteve,
faqosja dhe anglishtja e përdorur në program nga pala shqiptare janë
modeste por përshkrimi i masave është përgjithësisht i mirë. Gjithsesi
përmirësimet e tekstit dhe shpjegimeve mund të çojnë në qasje më të mirë të
masave.
“Nivelet maksimale të kostove totale të pranueshme të investimit për masën 1
dhe masën 3 dhe niveli maksimal i dyshemesë së investimeve për përfituesit
janë shumë të larta dhe mund të kufizojnë shpërndarjen e burimeve te
fermerët dhe agropërpunuesit më të vegjël dhe më të dobët. Strukturat
zbatuese janë përshkruar mirë dhe janë të vendosura për të lehtësuar
zbatimin efektiv të programit.
Megjithatë, mund të ndërmerren hapa për të rritur efektivitetin në AZHBR dhe për të përmirësuar transparencën e
vendimeve të marra në AZHBR. Rekrutimi i stafit për vendet e lira të punës në
AZHBR dhe Ministri ende nuk është kryer për të mbështetur zbatimin, por
proceset e rekrutimit kanë filluar. Trajnimet i stafit janë kryer intensivisht dhe
janë planifikuar edhe për stafin e ri.” thuhet në dokument.
I njëjti vlerëson se ka disa mangësi sa i takon regjistrave ku ai i fermave nuk
është ngritur ende kurse ai për kafshët nuk përditësohet rregullisht.
“Megjithatë, MBZHR ka ndërmarrë hapa për t’u siguruar që regjistrat të jenë
funksionalë kur programi të jetë gati për t’u hapur. Përfshirja e palëve të
interesuara në procesin e programimit ka qenë e mirë, por nuk është
përshkruar në mënyrë të përshtatshme në tekstin e programit” thuhet në
vlerësimin paraprak.
Sipas përmbledhjes programi IPARD III me 225 milionë euro parashikon
investime publike dhe private dhe mbështetje për 1700 fermerë,
agropërpunues dhe banorë ruralë si dhe mbështetje me 15 mijë shërbime
këshillimore për sektorin.
“Investimet do të gjenerojnë një rritje të Vlerës së Shtuar Bruto(VSHB) në
bujqësi dhe agropërpunim prej 30.9 milionë euro e barabartë me 1.16% të
VSHB-së së bujqësisë dhe agropërpunimit në total.
Do të krijohen 2558 vende
të reja pune dhe 2558 vende të tjera do të ruhen në bujqësi dhe
agropërpunim, e barabartë me 1.1% të fuqisë punëtore në të dy sektorët. Së
fundi, investimet në infrastrukturën rurale do të kontribuojnë në përmirësimin e
kushteve të jetesës në zonat rurale dhe mbështetja e investimeve në pylltari,
bujqësi organike dhe racat lokale të rrezikuara do të sjellë përfitime nga
biodiversiteti në këtë sektor” thuhet në dokument.
